Ausflüge

TdT-Nikolausstammtisch, der 100.!

 

 tdt2013

Ja sagt`s amoi, wia kemmts denn ihr daher?! Mit Jeans und Schwammerl an de Haxn! Koana do mit da Krachledernen?!

Dann passt`s a moi aaf, was i eich etz verzähl:

An Niklaus hab`  i droffa, grad vorher da draußn. Der had ma gsagt, dass er scho woas, was mir heit dern und was mir zum feiern ham. Grad a so gfreid had a se, wo er mi so gseng hod in meim Gwand, in da Lederbux.

Dasst`s es fei wissts -  der Nikolo des is koa Preiß neda; der kimmt a vo do! Wissts es iberhaupt, was der guade Mo o hod unter seim rotn Gwand? Des glaab i eich ja sofort, dasst`s es etza alle bläd schaut`s! Vo nix a Ahnung, aber scho glei vo gar nix!

Der hod a a Kracherte o, so wie mia eigentlich alle solltn!

Aber egal, er hod mir was verzählt, was i eich etz sagn soll. I hoff, dass i ned ois vergessn hab auf d`Schnell.

Gsagt hod a zu am jedm was vo uns, a vo dir,

 

OLI: di mag er ja total gern, hod er gsagt. Du bist oana, der se um an jeden und um ois kümmert. Bist halt a KÜMMERER, gell?

Schaugst auf an jedn, ned nur über, na, a unter Wossa. Des gfreid`n fei ganz vui! Bloß aufpassn sollst, dass`d ned z`überheblich werst. Woast was er damit moant? Ned, gell! Weilst di letzmoi gärgert hast, dass da ned alle für`d Azoren zuagstimmt ham, nur 99 %. Grad oana war dagegn. Des muas fei a gebn, gell?! Die TdT meng de doch alle, ned wahr?

  

Da Nächste vo eich, des wär da BÖRNIE.

Du kanntst eim wirklich schee langsam leid doa, hod er gsagt, da Nikolaus. S`vergeht koa Jahr, wos`d dei Wettn mim Oli verlierst! Sag a

mal, wos is`n los mit dir, hä? Daugst nix? … also nix ab, moant er. Da Niklas mog de aber a sehr gern, weil du kimmerst de ollawei um de Plätz im scheena Augustiner. Weida so!

 

Schaug ned so bläd, etz werst rasiert. Ja, du, PETER.

Duast zwar allawei a so, ois warst immer dabei, daweil, wannst dann amoi ausse kemmst aus Bayern, dann vadruckst de im Bett. Ja, so war`s doch am Attersee. Liegt da, brettlbroat auf seina Wampn, stört se ned, wenn a no andere Männer ins Bett eine kemma! Ja, sag a moi, hast d`as so nötig, ha? Mächt fast glaubn, dass`d nur dabei warst, weilst aaf`d Schpeidagrän g`hofft hast.

Dua de a weng ändern, gell! S`nimmt sonst koa guads End mit dir. A z`schlissene Oache und a Oaschloch des ausschaut wira Muffn, des kimmt bei deiner Carolin fei ned guad o!

 

An ROBERT hat`s des letzte hoibe Jahr ganz schee bläd dawischt. Mei, is halt a nimmer da Jingste, gell? Schaug, dass`d wieder auf`d Fiaß kimmst und dua de mit deim Technograffe ned a so oba. Nimm die 10er Flaschen und „kammbäktuseeruuts“. Mir dadn uns alle gfrein, wannst wieda mit uns abdaucha dadsd.

Egal, du machst des scho….aber oans soll i no sang zu dir: saaf endlich wieda a gscheids Bier und ned den alkoholfreia Blempe!

  

GÜNTER, mei Wahnsinn! Gibt der Gas in dem Jahr, macht oa Brevet nachm andern und möcht a no weida kemma, gell? S`Daucha werd scho schee langsam bei dir – derfst halt nur ned vergessn, dein Trocki gscheid z`schliassn. Dann muass da Börnie a koan Notaufstieg mit dir mehr macha.

 

So etz da ROLAND, der a im Himme scho als MAGNAT bekannt is. Jammert ständig vor se hin, moant, dass er zu de Ärmstn zählt, der Arme. Daweil ……. Luxusurlaub auf de Kanaren, a Haus hod er sowieso, a neis Auto obendrein, und … wer war heid da erste, der se wegn da Bayern-Kartn beim Holm gmeldt hod? Na klar, wer scho? ER! Den Füfzger, den hod a glei dafür parat, der Magnat.

Was schee war, des woast du ganz genau, des war a Rundn für dein Stammtisch. Einsicht ist die Weisheit, die kommt, oder man lasst`s bleibn.

 

Beim HOLM, a ganz a Neia, a wenn a nimma nei ausschaut, is des ganz was anders. I glaab, dem geht’s a so richtig guad bei de TdT. Des hod mag seng am Attersee, an seim Geburtstag. Grad a so gstrahlt hod a, mitm Helm auf`m Schwollschädl. Gfreid´n Nikolaus fei a, wenn der so was sigt.

Was aber no fui mehra gfreit is, dass da Holm se a oft großzügig zoagt hod. Gell, des muass a weiter so bleibm!

 

MARCO, Marco, du bist a ganz a Spezieller. Duad a so, ois dadn mir des ned raus´griang, des mir seiner Hochzeit. Klammheimlich und kleinlaut, so ganz nebenbei verzählt er´s beim Hans seim Sommerfest.

  

Da hod a scho a wenig gschaut, da Nikolo und ned nur der. Zeit werd`s, Dägansääar, grummliger! Eigladn hast uns ja wenigstns alle, bockliger. Mei liaba! Mehra sag i des Jahr ned.

 

Da MANI, schaugts`n eich o. Erst kummt a z`spaat, dann iberholt er. Was, es wisst`s ned, was gmoant is? I hob eam verzapft, dass i mir a neis Auto möcht kaffa. Da Mani kapiert erst gar ned, was i moan, bstellt se dann nach mia a a neis Auto und griagt des dann doch glatt no vor meim! So issa, da Mani. A unter Wossa. Z´erscht is a an der Oberfläche no über oam, aber drunnt dann, des is gwiss, is a oiweil tieafa ois alle andern. Was, des habt`s scho a moi g`hört? Stimmt! Was nei is, is, dass da Mani etz mi`m Liang ofangt! Ja, liang duad er! Hod er doch gsagt, dass er etz nimma so diaf daucha duad und a nimma da Diafste is. Mei liaba!

 

Wisst`s was a Raketn is? Neda? I kenn aber oan, der is a Raketn. Nämli da MARKUS. S´letzte Jahr no ganz kloa, ganz ruhig, ganz z´ruckhaltnd und heia? Gas gebm is da foische Ausdruck! A Raketn is er, der Hund! Kaum TdT-Mitglied, scho möcht`er oan auf Dauchlehrer macha. Aber ned so wia da Oli oder i, na, er monat er macht`s gleich vui gscheida. Suacht se glei de hibschn Weiber aus`m DCP-OWD-Anwärterpuul raus, der Hundling. Uns verzählt er, er hod koa Zeit, muass irgend was macha, ko ned mit uns zum daucha, daweil flaggt´er se mit de nettn Blondinen in Puul eine, der Hund, der websade! Mei liaba!

  

Oh mei, oh mei. Etz kimm i zum CHRISTIAN. Vom Niklas möcht i ausrichtn, dass du eam leid duast. Du woast scho, wega mir. Weil i immer sag, dass DU mei Videozeig oschaugn muast, a, wenn`s dir hernach schlecht werd.

Da Niklaus gfreit se no, des wollt`i dir no sang, ..was war des glei wieder? Zäfix, fallt mir ned ei, zäfix! Ah, halt, i woas scho wieda. Er gfreid se, weil`st wieda so fleißig mitduast beim daucha. Aber, des hod er a no gsagt, trotzdem bist a bläder Hund, so wia i a, hod a

er gsagt. Weilst a so bläd bist wia i, und dei Auto beim gleichn Bäcker kauffst, wie i, anstatt dass`d zum Autohändler gehst. Ob mir iberhaupt amal a Auto griang?!?

 

Am meistn glacht hat da Nikolaus über´n….ANDI! Der Niklaus is ja a a Mo, so wia mia halt a. DU, lieber Andi, hast di des Jahr als echter Macho bewiesn. Du woast ned was damit gmoant is? Ja, wegam Kino! Echt geil, mei hat der Nikolo glacht, grad vorher, wo i`n droffa hab. S`war nämli so, dass da Andi seiner Gabi an Schmarrn verzählt hod. Irgendwas von am romantischen Film hod er ihra verzählt. Daweil war`s fir de Gabi da reinste Horror. Des war nämli a Zombi-Film!

Ob de mit dir hernach no a moi im Kino war?

 

Da Hans war a stets bei de Ausflüg mit dabei. Aaf Gozo, wia a am Attersee. Daucht hod er a, aber ned so viel wia d`Jahr davor. Ihr liegt´s fei alle danebm, wannt`s es glaubt`s, dass da Hans koan Spaß mehra hätt. Da Niklaus woas des bessa, der woas des gwiß. An Hans hat´s heier bloß saubläd dawischt, mit`m Kranksei. I soll dir vo eam alles Guade wünschn, auf dass´d schnell wieder eini findst, in die Kondition, dann werd des scho wieda.

 

Übrigens, is dir eigentlich aufgfalln, dass dir beim Sommerfest a Faßl wegkemma is? I derf dir etz a sagn, wer´s war. Da Niklas mit seine Engal war`s. Is a ned nett? Paßt ollaweil aaf uns aaf!

 

Ja, bevor i`s vergiß: zu mir hod er a no was gsagt. I verzähl eich etz ned zvui, i merk scho, s`langweilt eich schee langsam. Aber nur sovui, dass er mi a an Kasperl gnennt hod, weil i immer a so an Schmarrn zammschreibn dua und eich in da Arbeitszeit a so Buidln und Videos schicka dua.

S´duad ma leid, und, wenn da MAGNAT se an Stoß gibt, dann zahl i ois TAIKUN d`Hälftn dazua, zur nächstn Rundn.

 

Prost und alle vo eich a scheene Weihnachtn!

Euer Barde, Dichter und Schreiberling

 Christian

 

Seite 4 von 20

mod_vvisit_countermod_vvisit_countermod_vvisit_countermod_vvisit_countermod_vvisit_countermod_vvisit_counter
Visitors Counter